અમદાવાદ, તા. 3 નવેમ્બર, 2026: વિદ્યાર્થીઓમાં ચાર્ટર્ડ એકાઉન્ટન્ટ (CA) વ્યવસાય પ્રત્યે જાગૃતિ કેળવવા અને ભવિષ્યમાં કારકિર્દીની ઉજ્જવળ તકો અંગે માર્ગદર્શન પૂરું પાડવાના ઉદ્દેશ્યથી ધી ઇન્સ્ટિટ્યૂટ ઓફ ચાર્ટર્ડ એકાઉન્ટન્ટ્સ ઓફ ઇન્ડિયા (ICAI) ની અમદાવાદ બ્રાન્ચ (WIRC) દ્વારા ઝાયડસ સ્કૂલ ફોર એક્સેલન્સના ધોરણ 10, 11 અને 12ના વિદ્યાર્થીઓ માટે ICAI અમદાવાદ ભવન ખાતે કેમ્પસ વિઝિટ અને કારકિર્દી માર્ગદર્શન કાર્યક્રમનું આયોજન કરવામાં આવ્યું હતું.
આ કાર્યક્રમ અંતર્ગત વિદ્યાર્થીઓએ ICAI અમદાવાદ ભવનની મુલાકાત લીધી હતી અને સંસ્થાની કામગીરી, માળખાકીય સુવિધાઓ તથા ચાર્ટર્ડ એકાઉન્ટન્સી વ્યવસાયના વિકાસ માટે ICAI દ્વારા હાથ ધરવામાં આવતી વિવિધ પ્રવૃત્તિઓ વિશે જાણકારી મેળવી હતી.
આ પ્રસંગે CA રિંકેશ શાહ, ચેરમેન, ICAI અમદાવાદ બ્રાન્ચ દ્વારા વિદ્યાર્થીઓને સંબોધિત કરવામાં આવ્યા હતા. તેમણે ચાર્ટર્ડ એકાઉન્ટન્ટ વ્યવસાયની વિશાળ તકો, બદલાતા વૈશ્વિક વ્યાપારિક પરિપ્રેક્ષ્યમાં CAની ભૂમિકા તથા આ વ્યવસાય દ્વારા ઉપલબ્ધ થતી વિવિધ કારકિર્દીની સંભાવનાઓ અંગે વિસ્તૃત માર્ગદર્શન આપ્યું હતું.
તેમણે જણાવ્યું હતું કે ચાર્ટર્ડ એકાઉન્ટન્સી માત્ર એકાઉન્ટિંગ અને ટેક્સેશન પૂરતો મર્યાદિત વ્યવસાય નથી, પરંતુ તે ફાઇનાન્સ, ઓડિટ, ટેક્સેશન, બિઝનેસ મેનેજમેન્ટ, કન્સલ્ટન્સી, ઉદ્યોગસાહસિકતા અને આંતરરાષ્ટ્રીય સ્તરે વ્યાવસાયિક તકોના અનેક દ્વાર ખોલે છે. આજના બદલાતા સમયમાં ભારતીય ચાર્ટર્ડ એકાઉન્ટન્ટ્સ માટે વૈશ્વિક સ્તરે પણ વિશાળ તકો ઉપલબ્ધ બની રહી છે.
CA રિંકેશ શાહે વિદ્યાર્થીઓને સંબોધતા જણાવ્યું હતું કે સફળતા મેળવવા માટે શિસ્ત, સાતત્ય, સમર્પણ, પ્રામાણિકતા અને સતત શીખવાની ભાવના અત્યંત જરૂરી છે. તેમણે વિદ્યાર્થીઓને શરૂઆતથી જ પોતાના કારકિર્દીના લક્ષ્યો નક્કી કરવા, વિશ્લેષણાત્મક ક્ષમતા વિકસાવવા, ટેક્નોલોજી અને આર્ટિફિશિયલ ઇન્ટેલિજન્સ (AI) સાથે તાલમેલ સાધવા તથા પડકારોને તક તરીકે સ્વીકારવા પ્રેરિત કર્યા હતા.
તેમણે વધુમાં જણાવ્યું હતું કે CA અભ્યાસક્રમમાં પડકારો જરૂર છે, પરંતુ યોગ્ય આયોજન, મહેનત અને આત્મવિશ્વાસ દ્વારા આ પડકારોને પાર કરી શકાય છે. ચાર્ટર્ડ એકાઉન્ટન્ટ્સ દેશની આર્થિક પ્રગતિ, વ્યવસાયોના વિકાસ અને રાષ્ટ્રના નિર્માણમાં મહત્વપૂર્ણ યોગદાન આપે છે.
કારકિર્દી માર્ગદર્શન સત્ર દરમિયાન વિદ્યાર્થીઓને CA અભ્યાસક્રમ, તેની પરીક્ષા પદ્ધતિ, પ્રવેશ માટેની લાયકાત, પ્રેક્ટિકલ ટ્રેનિંગ અને ચાર્ટર્ડ એકાઉન્ટન્ટ બનવાની સમગ્ર પ્રક્રિયા વિશે વિગતવાર માહિતી આપવામાં આવી હતી.
વિદ્યાર્થીઓને ઓડિટિંગ, ટેક્સેશન, ફાઇનાન્સ, કોર્પોરેટ મેનેજમેન્ટ, કન્સલ્ટન્સી, ઉદ્યોગસાહસિકતા તથા આંતરરાષ્ટ્રીય વ્યવસાયિક ક્ષેત્રોમાં CA માટે ઉપલબ્ધ કારકિર્દીની વિવિધ તકો વિશે પણ માહિતગાર કરવામાં આવ્યા હતા. આ ઉપરાંત વિદ્યાર્થીઓએ પ્રશ્નોત્તરી દ્વારા પોતાની જિજ્ઞાસાઓનું સમાધાન મેળવ્યું હતું.
આ પહેલ દ્વારા ICAI અમદાવાદ બ્રાન્ચે શાળાના વિદ્યાર્થીઓમાં વ્યાવસાયિક શિક્ષણ અંગે જાગૃતિ લાવવા, યુવા પ્રતિભાઓને પ્રોત્સાહિત કરવા અને આગામી પેઢીના ચાર્ટર્ડ એકાઉન્ટન્ટ્સ તૈયાર કરવા તરફ પોતાની પ્રતિબદ્ધતા વ્યક્ત કરી છે.
**“સ્થાનિક ચાર્ટર્ડ એકાઉન્ટન્ટ્સ માટે વૈશ્વિક તકોનું સર્જન”**ના વિઝન સાથે ICAI અમદાવાદ બ્રાન્ચ ભવિષ્યના વ્યાવસાયિકોને પ્રેરણા આપવા અને CA વ્યવસાયને નવી પેઢી સુધી પહોંચાડવા માટે સતત પ્રયત્નશીલ છે.
