અમદાવાદ : માનવતા, કરુણા અને જીવદયા જેવા ઉચ્ચ મૂલ્યોને અદ્ભુત રીતે રજૂ કરતી ગુજરાતી ફિલ્મ ‘જીવ’ હવે સિનેમાઘરોમાં દર્શકોને ભાવનાત્મક સફર પર લઈ જવા તૈયાર છે. 21 નવેમ્બરના રોજ સિનેમાઘરોમાં રિલીઝ થનારી આ ફિલ્મ સત્ય ઘટનાથી પ્રેરિત છે અને દરેક દર્શકના હૃદયને સ્પર્શી જશે.
તાજેતરમાં જ ફિલ્મનું મોશન પોસ્ટર લોન્ચ કરી ફિલ્મની રિલીઝ તારીખની સત્તાવાર જાહેરાત કરવામાં આવી, જે સોશિયલ મીડિયા પર દર્શકો તરફથી ઉત્સાહભર્યો પ્રતિસાદ મેળવી રહ્યું છે.
‘જીવ’ વિવાન ફિલ્મ્સ એલએલપીના બેનર હેઠળ બનેલી છે. ફિલ્મના નિર્દેશક જીગર કાપડી છે, જ્યારે પ્રોડ્યુસર તરીકે નીરવ મેહતા અને વિક્કી મેહતાએ આ ફિલ્મને હૃદયપૂર્વક સાકાર કરી છે. ફિલ્મમાં મુખ્ય ભૂમિકામાં જાણીતા અભિનેતા ધર્મેન્દ્ર ગોહિલ જોવા મળશે. તેમના સાથે સની પંચોલી અને શ્રદ્ધા ડાંગર જેવા પ્રતિભાશાળી કલાકારોએ પણ મહત્વપૂર્ણ ભૂમિકાઓ ભજવી છે. સાથે જ યતીન કાર્યકર અને હેમાંગ શાહ પણ આ ફિલ્મમાં જોવા મળશે.
ફિલ્મનું કેન્દ્રિય પાત્ર છે વેલજીભાઈ મહેતા, જેઓએ પોતાનું આખું જીવન પશુધનની સેવા માટે સમર્પિત કર્યું હતું. તેમના માટે પ્રાણીઓ માત્ર જીવ નહોતા, પરંતુ પરિવારના સભ્યો સમાન હતા. ધર્મેન્દ્ર ગોહિલ દ્વારા અભિનીત આ પાત્ર માનવતા અને દયાભાવનું જીવંત પ્રતિનિધિત્વ કરે છે.
‘જીવ’ માત્ર એક ફિલ્મ નથી, પરંતુ પ્રકૃતિ અને જીવજાત પ્રત્યેના આપણી ફરજ અને સહાનુભૂતિની યાદ અપાવતો એક સંદેશ છે. આજના સ્વાર્થભર્યા સમયમાં આ ફિલ્મ આપણને વિચારવા મજબૂર કરે છે કે શું આપણે મૌન જીવોની પીડા સાંભળી શકીએ છીએ?
ફિલ્મના નિર્માતાઓના જણાવ્યા મુજબ, “જીવ એ એવી કહાની છે જે માણસ અને પ્રાણીઓ વચ્ચેના અદ્રશ્ય લાગણીના બંધનને ઉજાગર કરે છે. આ ફિલ્મ દરેકને જીવદયા અને કરુણાના માર્ગે વિચારવા પ્રેરણા આપશે.”
21 નવેમ્બરે રિલીઝ થનારી આ ફિલ્મ ‘જીવ’- ગુજરાતી સિનેમામાં એક નવી દિશા આપશે, જ્યાં ભાવનાઓ, માનવતા અને સંદેશ ત્રણે સાથે એક અદભૂત અનુભવ રચે છે.
