આપણા સૌ ગુજરાતીઓ માટે પ્રાઉડ મોમેન્ટ કહી શકાય કારણકે, 71મા રાષ્ટ્રીય ફિલ્મ પુરસ્કારોમાં સાઈકોલોજિકલ થ્રિલર ‘વશ’ને બે મહત્વપૂર્ણ એવોર્ડ મળ્યા. શ્રેષ્ઠ ગુજરાતી ફિલ્મનો એવોર્ડ ફિલ્મને મળ્યો, જ્યારે જાનકી બોડીવાલાને શ્રેષ્ઠ સહાયક અભિનેત્રીનો એવોર્ડ અપાયો. ગત મહિને જાહેર કરવામાં આવેલા 71મા રાષ્ટ્રીય ફિલ્મ પુરસ્કારોમાં 1 જાન્યુઆરી, 2023 થી 31 ડિસેમ્બર, 2023 સુધી CBFC (સેન્ટ્રલ બોર્ડ ઓફ ફિલ્મ સર્ટિફિકેશન) દ્વારા પ્રમાણપત્ર પ્રાપ્ત તમામ ફિલ્મોનું મૂલ્યાંકન કરવામાં આવ્યું હતું.
દિલ્હીના વિજ્ઞાન ભવન ખાતે યોજાયેલી ભવ્ય પુરસ્કાર વિધિમાં રાષ્ટ્રપતિ શ્રીમતી દ્રૌપદી મુર્મુએ એવોર્ડ્સ એનાયત કર્યા. શ્રેષ્ઠ ગુજરાતી ફિલ્મ માટેનો એવોર્ડ દિગ્દર્શક કૃષ્ણદેવ યાજ્ઞિક (બિગ બોક્સ સિરીઝ પ્રોડક્શન) અને પ્રોડ્યુસર કલ્પેશ સોની (કેએસ એન્ટરટેઇન્મેન્ટ) એ સ્વીકાર્યો, જ્યારે જાનકી બોડીવાલાને શ્રેષ્ઠ સહાયક અભિનેત્રી માટેનો એવોર્ડ એનાયત થયો. આ અવસરે ફિલ્મના પ્રોડ્યુસર્સ કલ્પેશ સોની, કૃણાલ સોની, નિલય ચોટાઈ અને દિપેન પટેલ પણ હાજર રહ્યા.
પ્રોડ્યુસર્સે જણાવ્યું, “આ અમારી માટે અત્યંત ગૌરવની ક્ષણ છે. વશ બનાવતી વખતે ક્યારેય વિચાર્યું નહોતું કે ફિલ્મને રાષ્ટ્રીય સ્તરે આ માન્યતા મળશે. આ એવોર્ડ ટીમની મહેનત અને દર્શકોના પ્રેમનું પરિણામ છે. તે અમને વધુ સારા વિષયો પર કામ કરવા પ્રેરણા આપે છે.”
દિગ્દર્શક કૃષ્ણદેવ યાજ્ઞિકએ ઉમેર્યું, “ગુજરાતી સિનેમામાં સાઈકોલોજિકલ હોરર જેવા વિષયને પ્રામાણિક રીતે રજૂ કરી શકવું ગૌરવની વાત છે. આ એવોર્ડ અમારી ટીમ અને દર્શકો બંનેને સમર્પિત છે.”
અભિનેત્રી જાનકી બોડીવાલાએ કહ્યું, “રાષ્ટ્રપતિના હસ્તે આ સન્માન મેળવવું મારા માટે સૌથી ખુશીની ક્ષણ છે. હું કૃષ્ણદેવ સર અને સમગ્ર વશ ટીમનો આભાર માનું છું. આ એવોર્ડ મારા અભિનય જીવનનો મોટો માઈલસ્ટોન છે.”
2023માં રિલીઝ થયેલી વશમાં હિતેન કુમાર, હિતુ કનોડિયા અને જાનકી બોડીવાલાના અભિનય સાથે વશીકરણ અને સસ્પેન્સથી ભરપૂર વાર્તા દર્શાવવામાં આવી હતી. ફિલ્મના ગાઢ કથાનક, અનોખી સિનેમેટોગ્રાફી અને કલાકારોના શક્તિશાળી અભિનયને કારણે દર્શકો અને સમીક્ષકો બંનેમાં પ્રશંસા મળી. આ ફિલ્મ પરથી બૉલીવુડમાં પણ રીમેક બની.
આ રાષ્ટ્રીય માન્યતા માત્ર વશ ટીમ માટે જ નહીં, પરંતુ સમગ્ર ગુજરાતી સિનેમા માટે ગૌરવની વાત છે. સાઈકોલોજિકલ હોરર જે સામાન્ય રીતે રિજનલ સિનેમામાં બહુ જોવા નથી મળે, તેને આ ફિલ્મે નવી ઊંચાઈ આપી છે.
